小牛掃雷 重返總決賽 德國槍驚天救贖

奪命「3+2」稱霸西岸

今場大部分時間處於落後劣勢嘅小牛，去到第四節剩餘1分15秒時，終憑魯域斯基冷靜地射入關鍵三分球反先。「德國槍」其後再入兩記罰球拉開4分優勢，雷霆最後階段連番施射不中，小牛終險勝對手，率先殺入總決賽，等待熱火與公牛嘅勝方。

小牛對上一次打入總決賽，已經要數到06年，當時稍為意外地以4號種子身份，淘汰鳳凰城殺入總決賽，可惜卻在先下兩城的情況下，以2比4不敵熱火。不過小牛今季有機會復仇，事關後者在東岸決賽已領先公牛3比1，大有可能重演06年決賽翻版。

今場表現最Sharp依然係魯域斯基，雖然佢減少了起手次數，取得26分及9個籃板，但關鍵時刻射入價值連城嘅三分球，確實令人印象深刻，至於馬利安亦貢獻了26分、8個籃板及3次封阻。「德國槍」賽後憶述黃金一刻：「雖然第一球冇投中，但並冇影響我，我看見防守球員距離很遠，便毫不猶豫出手。我必須感謝一眾隊友，係佢哋積極搶籃板，我先有出手機會。」

小牛教練卡素爾忽現醜態。（美聯社圖片）	小牛fans嘈到拆天。 （美聯社圖片）	小牛球迷舉牌「反雷霆」，果然使得！ （美聯社圖片）

洗脫「季後賽軟蛋」污名

現年32歲嘅魯域斯基，雖然早已成為NBA一線球星，可惜近季卻被球評家視為「季後賽軟蛋」，一到季後賽就難擔重任，最羞恥莫過於在07年季後賽被勇士淘汰，成為「老八傳奇」悲劇主角，最諷刺係「德國槍」當季獲選為常規賽MVP，領獎時都尷尷尬尬。幸好魯域斯基今季終於吐氣揚眉，在西岸決賽兩次轟入「40+」得分，4場命中率超過五成（見附表），難怪巴克利都話地球上冇人防得住呢把「德國槍」。

「德國槍」彈無虛發

賽事 命中率(命中/起手次數) 得分 勝負

Game1 80%(12/15) 48分 勝

Game2 58.8%(10/17) 29分 負

Game3 33.3%(7/21) 18分 勝

Game4 60%(12/20) 40分 勝

Game5 53.3%(8/15) 26分 勝

註：西岸決賽數據

本報綜合報道