「不甘心 就是不甘心 不過我肯等 等一生都等」。小牛球員就好似Eason首歌《阿牛》一樣，一日未圓冠軍夢，一日都「不甘心」！可惜球隊大部分主力都係「70後」，職業生涯均踏入黃昏階段，未必可以「等一生都等」。
小牛堪稱近年NBA悲情球隊，事關佢哋連續11季打入季後賽，卻一直與總冠軍擦身而過，現時在小牛陣內，無任何球員擁有過冠軍指環。最弊係小牛主力年紀唔細，魯域斯基、傑特、馬利安、史杜積高域、泰利及希活都屬於「70後」球星，若然今季都未能圓夢，睇怕未來都冇乜機會。尤其係傑特，呢位老將今年已經38歲，預計都會喺呢兩年內退役，在傑特17季職業生涯中，此前曾兩次為籃網打入總決賽，可惜都在總決賽中落敗，今次則係佢人生第3次Finals機會。
2010 首圈不敵馬刺 (2:4)
2009 次圈不敵金塊 (1:4)
2008 首圈不敵黃蜂 (1:4)
2007 首圈不敵勇士 (2:4)
2006 總決賽不敵熱火 (2:4)