分岸一哥唔做好過!

NBA季後賽經過兩日賽事,東西岸十六隊已全部亮相,今年季後賽實力接近,除鷹隊在首日擊敗魔術之外,馬刺與灰熊兩支排名較低嘅球隊亦能先拔頭籌,令人大跌眼鏡。

弱隊變通 奇兵突出

之所以有咁多爆冷賽果,阿裕認為係被睇淡嘅「弱旅」懂得變通!由於實力已不及對手,較弱嘅球隊想贏波,自然要想多少奇招去突圍,至少改一改球隊風格,殺對手一個措手不及。反觀一眾強隊就因為常規賽表現順暢,往往好少去改變打法,反而令人較易洞悉弊病。

再者,強隊往往因為係前列種子,背負太多壓力,尤其係分岸一哥,一旦輸波就會成為「老八傳奇」嘅主角,每年季後賽就會被人拎番出嚟笑,所以攞分岸冠軍,有時未必係好事。