羅馬世界游泳錦標賽跳水產生第一金，由頂頭大熱門中國「夢之隊」秦凱及張新華在男子一米板包辦金、銀牌，打響頭炮。至於由郭晶晶、劉子歌及花泳隊員領銜主演嘅「奧斯卡級」大型廣告，正於內地熱播，為中國隊出戰世界賽增添聲勢。（有線體育台62周日晚7時45分直播）

張新華摘銀牌

中國跳水隊攞金牌易過借火，但其實第一金產生過程都幾戲劇性，今場決賽，澳洲猛將馬菲米查姆表現出色，跳到第四輪更壓過秦凱升上第一位，秦凱第二，張新華第四。

不過，最後兩輪自選動作，中國兩位選手就贏幾條街，秦凱使出兩項絕技「反身翻騰兩周半屈體」及「向內翻騰兩周半屈體」，以449分反勝奪金，張新華落後3.1分得銀牌，馬菲米查姆得銅牌。男子一米板並非奧運項目，秦凱笑說：「其實我好少玩一米板，連副項都講唔上，只係用咗一個月時間練習。」

水軍史詩式廣告熱播

世界賽舉行期間，中央電視台播出一套由中國跳水、游泳及花泳三路「水軍」聯合拍攝嘅一輯廣告，坊間反應熱烈，被粉絲稱為「史詩式廣告大片」，原來此條廣告片是由曾獲奧斯卡最佳攝影獎提名嘅澳洲導演羅比亨特執導，演出明星包括跳水隊郭晶晶、吳敏霞、游泳冠軍劉子歌、花泳蔣文文及蔣婷婷姊妹等合共三十位美女，單是製作費已超過三百萬元人民幣，以兩個月時間拍成一輯只有三十秒嘅廣告片，每秒鐘價值超過十萬元人民幣。 本報綜合報道