優先處理

我哋喺網上成人討論區，搵嚟曾被關拘留所次數最多嘅版主興哥，講吓失手就擒後要點樣自保呢？興哥話：「我分別喺深圳、東莞、廣州、番禺同埋茂名坐過拘留所，講經驗，我認咗第一，冇人敢認第二，五個拘留所加加埋埋，坐咗成個月咁耐。」

如果失手就擒，最緊要做乜嘢呢？興哥話：「千祈咪扮大哥，大大聲話要搵律師。一定要冷靜同埋合作，上面執法唯一標準，就係坦白從寬，抗拒從嚴，你愈玩嘢，日子會愈難受。」咁會唔會畀人打一身呀？興哥話：「咁又唔會！」

據興哥解釋，有關單位嘅辦案程序，一般都會先處理外地人士，例如港澳同胞，因為佢哋證件清楚，唔使查核，所以優先處理。但如果你態度囂張，就會把你留到最後處理。一晚拉一百幾十人，其他人落晒口供至到你，可能要等足廿四小時以上。

坦白從寬

興哥仲話：「到你落口供，一 定要知無不言，如實報告，事關拉得你就冇得唔認，你只能夠將功補過，人哋優先處理你，就有先爆料嘅機會，然後就將所有嘢照實講晒出嚟，咁你就會得到寬大處理，好快就可以送你去拘留所。」

興哥繼續話：「但如果你唔合作，乜都話唔知，唔肯爆料嘅，咁你就有排等。大家都估到警局嘅拘留室會係點嘅樣，五湖四海嘅大哥喺埋一齊，你瞓又唔係，屙尿都唔敢，食飯一定唔夠人搶，咁樣要你困廿四小時，仲唔人都癲咩？所以咪講義氣，你一個唔爆料，其他人爆，班友仔後果都係一樣，但吃虧嘅就係自己。」

落完口供之後，有啲警局仲要你寫一份悔過書，類似認罪書，好多人都唔願寫，以為一寫就冇得返轉頭，其實一定要寫㗎！

寫悔過書

興哥話：「玩家搞女喺內地嚟講係屬於犯法，但案情好輕，只要落好口供，坦白交待，之後寫埋悔過書，佢哋就會從輕法落，有時只要交咗罰款就放出嚟。但如果係大行動或者喺當地已經係衰過好多次，咁至會罰你去拘留所踎幾日，但如果你死都唔肯寫悔過書，佢哋根本完成唔到你嘅案件，惟有擺多你幾日再處理。」

興哥補充話：「完咗案件去到拘留所，就可以通知家人，之前喺警局期間係唔可以嘅，之後親人會攞啲日用品嚟畀你，但其實喺佢哋嘅小賣店買會更好，因為啲用品會第一時間送入去，而且老闆娘仲會教你好多規矩，等家人喺裏面好過一啲。」

另外興哥話門口好多騙子，話有辦法疏通，其實拘留所唔係監獄，拘留時間有限，你畀咗錢之後，佢拖得一頭半個月，人自然放出嚟，根本唔使疏通，所以千祈咪上當。興哥最後話：「衰咗就認，坦白交待，咪講義氣，爭取表現。」大家記住呀！

撰文：小德