賽事於馬德里鬥牛場舉行，分兩日比賽，經過第一日資格賽，第二日進行KO賽，車手都用高難度動作搶分，法國車手比卓斯大膽到離晒譜，竟然打算做未有人嘗試過嘅前空翻，結果兩次試跳都落地失敗，幸好沒有大礙。

澳洲車手失事送院

不過澳洲車手冼佳亞則發生意外，這名曾於資格賽成功做出兩周翻騰嘅廿五歲車手，於半準決賽做同樣動作時失手，翻騰高度不足，導致前輪着地，冼佳亞成個拋下動彈不得，要立即送往醫院急救，初步消息指出他送院時仍然清醒。

今次賽事冠軍係丹尼托利斯，呢位車手由八強開始一直力壓對手過關，做出多個高難度動作，包括將電單車作270度擺尾，決賽力壓美國車手阿當斯，成為「Red Bull X-Fighters」電單車飛行世界巡迴賽西班牙站冠軍，並贏盡現場二萬三千名車迷歡心。

賽制

「Red Bull X-Fighters」電單車飛行世界巡迴賽總共有五個分站，計有墨西哥、加拿大、美國、西班牙及英國，共有十二名車手角逐，每個分站冠軍有一百分，亞軍八十分，季軍六十分。

每個分站車手先進行資格賽，每次有分半鐘時間讓車手自選動作，跟住進行第一圈賽事，頭六名直接進入八強，其餘車手要進行第三輪比賽爭最後兩個出線席位。八強至冠軍戰則以淘汰賽形式進行，兩位車手單對單KO，決賽兩位車手則有兩分鐘表演時間。

記者周兆年西班牙直擊