火箭大意失荊州，被拓荒者追成二比三！尋日火箭再度作客波特蘭，雖然末節一度處於領先狀態，可惜尾段又試腳軟，竟然讓拓荒者打出一波15比0攻勢拋開分數，最終火箭大意之下輸77比88，錯失提前晉級機會。至於前年總冠軍馬刺，同日主場再負小牛，總成績輸一比四宣告畢業。
誓破首圈魔咒
第五回合，只要火箭作客贏波，就可以自九七年後，首次晉級季後賽次圈。雖然火箭開賽後一直處於下風，但球隊喺第四節剩餘八分鐘左右，已一度逆轉反先拓荒者4分。可惜大意之下，拓荒者由萊爾率軍打出一段15比0攻勢，一下子拋離火箭11分之多，最終火箭返魂乏術，以77比88輸波。
拓荒者兩大主將萊爾及艾迪列治同樣貢獻全場最高嘅25分，至於客隊最佳就係史高拉，個人攻入21分及6個籃板，而姚明亦交出「雙雙」15分及12個籃板。明日火箭將會重返主場應付第六戰，若然主場之利都有所差池嘅話，氣勢盡失下第七仗會非常不利，所以火箭肯定視明日一戰為生死戰，幸好休斯敦主場向來有保證，讓5.5分都要上盤。（周五早上9時30分開賽）
小牛轟馬刺出局
另一方面，小牛成為今季第三支晉級次圈球隊。作客嘅小牛憑魯域斯基攻入31分及9個籃板，加上「最佳第六人」泰利貢獻19分，最終小牛以106比93擊敗馬刺，總成績四比一出線，而今次亦係馬刺近九季首次季後賽首圈出局。