政情：腰椎舊患加硬板床 尹兆堅痛上加痛

肥尹話舊年5月8日立法會內會選主席時，佢同其他議員發生爭執期間被推倒，觸發腰部舊患，之後條腰就出咗問題，唔可以做大幅度後拗動作，仲要用護脊床褥瞓覺，兼且要搵脊醫或者物理治療師治理腰患。

無覺好瞓 問網民意見

但隨着佢被羈押，不但搵唔番一直為佢跟進腰患嘅脊醫同物理治療師，每晚仲要瞓喺由玻璃纖維製成嘅硬板床上，由於欠缺軟墊，每當側睡都會令到腰同膊受壓，腰椎舊患就更痛喇！佢話無覺好瞓、坐立不安，形容每朝起身都好似打咗場摔角咁喎。而佢嘅團隊就喺網上詢問網民意見，睇吓會唔會有一啲方法應對硬板床，再轉達畀肥尹試試。