爭出線撲擊大阪櫻花 傑志搶W勢創歷史

傑志暫時以10分排J組次名，落後穩奪出線席位的榜首球隊大阪櫻花3分；傑志要爭首名出線，今仗必須至少以兩球淨勝櫻花，就算想以最佳小組次名晉級，對比其他組別次名球隊得分之後，其實「藍鳥」亦必須贏波全取3分。總教練朱志光表示，球員渴望出線為香港再創歷史，惟目前疲態盡現，不會向他們施加太大壓力：「鬥志係有，但一定要用腦踢波，唔可以魯莽咁攻，呢隊係大阪櫻花，無論人腳同能力都喺我哋之上。」後防大將艾里奧今場必然缺陣，勢削弱傑志防守力，「朱Sir」稱會專注填補空位，減少對手在邊路策動攻勢，瓦解櫻花的組織。

早前連續4場有波入的丹恩奴域，上場終告「斷纜」，與賽程頻密導致體力下降不無關係。他指球員唯一可做，就是爭取休息，加快體能恢復。這名黑山射手坦言，未有為出線作太多分析：「我冇理會過，但一定唔會放棄呢場比賽，我哋會戰鬥到最後，先睇出唔出到線。我知道會好難，呢場係我哋唯一一次踢早場，體能會更嚴峻，我哋需要運氣同盡力表現好自己。」

櫻花泰亞高攻守兼備

大阪櫻花已提早晉級，上場大部分主力輪休，今仗或重返正選位置對戰傑志。雖然老將大久保嘉人已經39歲，但今季為櫻花射入7球，成為首席射手，今場有望擔正與丹尼和丹恩奴域合演「39歲的對決」。澳洲射手阿當泰加特自上次對壘傷出後一直缺陣，今場或繼續無緣披甲。

翼鋒坂元達裕上循環對傑志表現突出，櫻花扳平一球正來自此子施襲，預料傑志左路今場會再次被重點攻擊。中堅泰亞高具備入球能力，近5仗入3球盡顯「帶刀侍衞」本色，預計今仗會與瀬古步夢扼守中路，而南韓國門金鎮鉉則會取代越南門將鄧文林，重回正選把關。