政情：鄭若驊管治一團糟 刑檢專員冇人肯做
律政司內部屢出現跳船潮，被嘲為「避政司司長」嘅律政司司長鄭若驊上任短短3年以嚟，已經有4名律政司高層跳船。前刑事檢控專員梁卓然更加透露，由於同鄭若驊意見不合決定請辭。之不過，佢「劈炮」至今已經大半年，鄭若驊仲未搵到替任人選，令到職位變相由各個副刑事檢控專員輪流署任。有學者直斥佢搞到個熱廚房咁熱，自己做嘢做唔好都算，搵個人做嘢都唔得，叫佢盡快落台啊！
梁卓然喺去年12月底離職，當時喺內部電郵中透露佢同鄭若驊喺刑事檢控科嘅運作上意見不合，亦未有隨住時間過去得到改善。佢話喺部門服務長達25年，而且作為部門主管，實在唔願意見到呢個情況，認為會不利於部門嘅暢順運作。佢相信由其他人出任職位會為部門帶嚟新理念，對司長同部門都係最有益處。
政府公布楊美琪再署任3個月
不過，可能梁卓然發夢都冇諗過，鄭若驊過咗大半年仲未搵到接任人選，首先要由律政司副刑事檢控專員兼資深大律師譚耀豪接替，出任署理刑事檢控專員。譚嘅任期去到3月31日完結，政府就公布由隸屬於特別職務組嘅副刑事檢控專員楊美琪繼續署任至到6月30日。點知政府尋日再將楊嘅委任期延長3個月至到9月30日為止，換言之佢將會擔任署理刑事檢控專員一職長達半年。
學者斥乏刑案經驗 促退位讓賢
刑事檢控專員一職變相由各個副刑事檢控專員輪流署任，香港理工大學專業及持續教育學院講師陳偉強提到署任一職，難免會令外界覺得係唔夠資格先至唔可以坐正。佢話有關圈子人數眾多，要搵一個人統領部門理應唔難，質疑係由於鄭若驊本身名聲唔好，難吸引人才同佢坐埋同一條船；再加上鄭若驊先天不足，缺乏處理刑事罪行經驗，同有關人才關係唔密切。不過現時刑事案件眾多，有關職位又位高權重，始終需要一個真正嘅刑事檢控專員提供意見，如果鄭若驊長時間未能夠搵到人選，實在講唔過去。陳直言事件反映鄭若驊力有不逮，早啲退位讓賢好過啊！