羅致光漠視炎夏工作困境 離地如在冥王星
近日本港天氣炎熱，唔少須戶外工作嘅工人酷熱難耐。勞工及福利局局長羅致光尋日有如天文曆法家上身，話年初睇《通勝》春牛圖就有直覺今年或者特別熱，認為勞資雙方都有責任預防工人中暑。羅仲透露兒時對天象感興趣，更一度考慮做太空人，但最後因難承受離心力而放棄。其實佢近年多次被議員炮轟不食人間煙火，制訂嘅政策「離地」到好似上咗冥王星咁，似乎羅依家不費吹灰之力就輕易達成兒時夢想喎。有議員就建議羅應該更有同理心及親身體會工人辛酸，先可以擺脫負面形象啊。
羅致光尋日喺網誌開首就提到兒時志願，話由於自己喺兄弟中排行第八，屋企向海嘅一邊牆又掛咗個八卦，所以對天文、地理風水都「八八卦卦」喎。佢仲話曾一度考慮修讀天文學同想成為太空人，但知道自己承受唔到火箭升空時5G以上嘅離心力而放棄。
雖然佢放棄做太空人，但睇嚟佢都幾沉迷研究曆法，話年初睇《通勝》春牛圖就直覺認為今年可能會特別熱，而天文台喺上月23日下午就錄得最高氣溫攝氏36.1度，係1884年有紀錄以嚟5月最高氣溫。佢話關愛基金其後承接咗一啲團體計劃理念，喺上年6月推出為期兩年嘅「為低收入劏房住戶改善家居援助計劃」。
佢又提到職安局喺今年4月推出「中小型企業掛腰風扇資助計劃」，向較高中暑風險行業嘅中小型企業提供資助，以優惠價換購掛腰風扇，助僱員散熱降溫。另外，當局去年底已檢討措施，喺報告建議向喺夏季進行戶外工作嘅非技術僱員，提供以快乾物料製成嘅制服。
工會倡中暑列職業病 多年冇影
勞工界議員陸頌雄就話羅只係講政府工作，畀人感覺如「賣貨」，欠缺同理心，認為對方需要有更多體會，多描述僱員會遇上嘅困難，先可改善「離地」形象。佢又指工會多年爭取政府將中暑列為職業病，但一直未得到回應，局方只當作工傷處理，導致勞資糾紛不時出現。
被促訂明確指引 規定休息時間
至於以優惠價換購掛腰風扇嘅計劃，陸就話並非所有企業會為僱員購買，希望局方可容許工會代購或畀僱員自行選購，令更多人受惠。佢又建議，政府應訂立更明確嘅防止中暑指引，規定僱員指定休息時間，同時教育企業和公眾相關知識。