政情：拖贍養費監管不力 官員4式耍太極
就算夫妻緣盡，都有責任向前伴侶支付贍養費，但現實情況係唔少單親家庭因贍養費「拖數」而面臨經濟困境。對於有意見建議港府應參考外國做法，設立贍養費管理局統籌有關事宜，有關當局就搬出諸多理由，包括以數據聲稱離婚人士唔需要贍養費、話申請人未有利用法律程序追討欠款等，有議員狠批政府回應係耍太極4式，完全無意解決問題！
議員葛珮帆（EQ）尋日引述政府統計處於2015年嘅調查，指有大約四成離婚人士未能全數收取贍養費。另外又有約九成被拖數嘅人士，因程序太繁複以及追討過程曠日持久，無奈放棄法律行動追討欠款。EQ話好多單親媽媽對佢「一路講、一路喊」，話礙於「時畀時唔畀嘅贍養費」，必須出外謀生以應付生活開支，但當擁有些少資產又申請唔到綜援。雖則話可以透過法律程序追討拖欠嘅贍養費，但佢哋根本冇餘錢打官司，反問點解前年反對修訂《逃犯條例》示威中受傷嘅「爆眼女」竟可輕易攞到法援。
拒設管理局統籌 諸多藉口
民政事務局局長徐英偉，就同樣引述統計處喺2015年至2016年嘅調查，指期間約有36萬名曾經離婚或者分居嘅人士，當中大約八成並無打算申請贍養費。雖然有意見主張港府參考外國政府做法，設立贍養費管理局統籌有關事宜，徐就話政策有其利弊，擔心會向社會釋出錯誤訊息，怕有人認為有個局處理有關事宜，就可以逃避支付贍養費嘅責任。況且，外國嘅贍養費管理局，其運作所需嘅行政費高企，甚至要收取當中約兩成嘅贍養費，政府正委託機構進行相關研究。
徐英偉發表回應後，另一議員謝偉俊則力數「局長耍太極4式」，包括指數據顯示離婚人士冇需要申請贍養費、現行制度有保障、「有一大籮法律程序，只係申請人唔做」，同埋已有研究程序。謝批評有關研究並非由政府執行，而係提交予家庭議會，先討論再研究，簡直係「耍完又耍」。議員容海恩則不滿徐局長嘅回應，令單親家庭「睇到好勞氣、眼火爆」，又話礙於照顧小朋友，單親家長好難搵工作，仲要佢哋進行煩瑣嘅法律程序，根本唔可能做到。