政情：不願宣誓 東區1日3區議員辭職
因拒絕宣誓而宣布辭職嘅區議員，尋日再增同是東區區議員嘅曾因瑩、傅佳琳同陳嘉佑3人。
曾因瑩透過社交平台表示，當初參選區議員嘅最大原因是希望為社區出力，但當選區議員以來，不時出現一眾議員喺會議室「與空氣對話」嘅場面，區內相關議題亦一直停滯不前。令佢深感呢種會議已變得無意義，加上種種壓力以及無力感，無奈作出辭任嘅決定。
下月1日起終止職務
傅佳琳亦持相同見解，指感到自己無法兌現選舉承諾，再三思慮決定辭職，對於未能完成任期，表示愧疚和抱歉。
陳嘉佑就發出貼文指自己正面臨人生交叉點。儘管區務方面，仲有好多議題無法推進，一啲講過要舉辦嘅活動亦冇兌現。但陳近一年來經歷過長時間失眠，社會嘅負面發展令佢身心俱疲，經慎重考慮，決定請辭。
曾因瑩、傅佳琳同陳嘉佑都宣布，佢哋嘅區議員職務由6月1日起終止。
