加強監察黑資金 警開新位有必要

兵馬未動,糧草先行。古代行軍,都深明有了糧草、兵器等保障,軍隊才能喺前線全力和專心作戰,若然後勤出現問題,軍隊就有潰敗嘅危險。呢!本港2019年爆發反修例風波,烈火暴行搞到香港雞犬不寧,尤其被稱為「火魔法師」嘅縱火暴徒,佢哋走在最前線,一身裝備精良,防毒面罩頭盔都型過人,外界質疑背後涉及大量資金支援及牽涉勾結外國勢力,呢個質疑,確非無的放矢!

有道是「入門休問榮枯事,且看容顏便得知」;冇錯,有啲嘢的確從容顏上可察覺,好似人衰行路打倒褪,行行吓都仆街嘅屎坑蟲,梗係知佢時辰到一切都報!而黑暴之所以可以如水四滲,正如有議員話齋,如果背後冇牽涉不明來歷嘅資金作出支援,係侮辱佢嘅智慧,促港府喺不同渠道加強監察。

呢嗱,立法會人事編制小組委員會尋日通過喺警務處開設一個為期5年、年薪近200萬元嘅總警司編外職位,專責領導即將成立嘅財富情報及調查科,加強打擊洗黑錢及恐怖分子資金籌集嘅行動。黑暴以來,規模之大,資源之多,背後牽涉不明來歷嘅資金支援彰彰明甚。

好似警方曾以涉嫌洗黑錢拘捕「星火同盟」多人,檢獲13萬元現金、價值16萬元嘅超市現金券收據及大量個人防護裝備,並凍結銀行戶口約7,000萬個大洋!警方調查發現,大約半年間「星火同盟」籌得8,000萬元,大部分籌得嘅款項流入一間空殼公司,除咗涉及大量現金交易,主要用作購買個人投資保險產品,與其業務不相符。

有議員指出,香港作為國際金融中心,擁有複雜及大量嘅資金流,有資金流入作非法用途,令人不寒而慄,豈能不從多渠道想方設法加以監察?亦有議員指自違法佔領行動至前年嘅黑暴事件,均動員大量資金及資源,有關人士進行眾籌,講緊係「億億聲」,究竟錢從何來?唔通樹上生出來咩?有議員提出,與黑暴有關嘅「612基金」借用其他組織嘅戶口及地址運作令人生疑。

事實上,本港長期被洗黑錢活動困擾,而洗黑錢不單止牽涉虛擬貨幣,亦包括現金交易,有議員舉例「3蚊買斤菜,帳簿寫10蚊」,又或者政黨利用街頭籌錢洗黑錢。警務處助理處長葉雲龍回應指,現金流的確較難追查,之不過相信現金最終仍會進入銀行金融體系,可依靠可疑交易報告作情報分析。講到呢處,可見要打擊不明來歷嘅資金和洗黑錢,都真係如半夜食黃瓜,唔知頭唔知尾!今警方擬開新位監察黑暴資金,以不同渠道去分析狙擊,堵截其勾結外國勢力,有利強政勵治,任重道遠,新職位的確唔慳得!