中環出更：體驗做超市理貨員 顏汶羽：人工使到所餘無幾
百物騰貴，基層嘅生活相當唔容易。觀塘區議員顏汶羽（Frankie）日前拍攝短片上載網絡，當中可見佢為某超巿擔任理貨員。儘管係體驗性質，不過就令佢感到物價高而人工低，基層嘅收入喺扣除開支後，真係所餘無幾，又話釐定最低工資嘅方法不合時宜，應該改用方程式計算咁話。
促制訂方程式釐定最低工資
Frankie話香港好多巿民都係基層勞工，當中唔少人嘅時薪都只係略高於最低工資，得40蚊左右，而佢就問過超巿裏面嘅同事，一日工作8個鐘，即是日薪300幾蚊，之不過依家出街食個午餐動輒都要50、60蚊，咁計落剩低嘅薪水實在好有限。對於現行嘅兩年一次檢討最低工資，Frankie認為並不可取，因為會出現滯後嘅情況，而勞資雙方談判工資加幅，亦往往發生僵持不下嘅場面。Frankie主張制訂一條方程式，到時到候就依照物價或生活指數調整最低工資，佢認為呢個方法相對客觀，勞資雙方嘅代表亦可避免爭拗。不過方程式要涉及乜嘢指標同數據，就要社會各界討論啦！
卓妮