某些行業的員工在工作時需要經常用聲，例如老師在授課及照顧學生時經常需要用聲，如沒養成良好習慣去保護聲線，容易導致聲線問題，嚴重時更會致病，例如聲帶結節及慢性聲帶炎等，如你要經常用聲就一定要學識以下嘅護聲小貼士。
小美問：「小麗，今日出街行吓，做咩粒聲都唔出，唔開心呀？」小麗聲音沙啞咁答：「唔係呀，我呢個星期教書係咁講嘢，搞到把聲好沙，依家費事講咁多咋。」小美說：「你返工需要經常用聲，平時講嘢又急又快又大聲，仲鍾意食埋啲辣嘢，把聲梗係易出事啦！等我醒幾招護聲小貼士畀你啦！」
小美續說：「首先喺講嘢習慣方面，要避免側住頭講嘢，講嘢速度要適當，在句子同句子之間應有適當嘅停頓同回氣；發聲嗰陣要將口腔張大，令所講嘅字句更清晰，聲線亦會較響亮。」
小美又說：「仲有呀，你要識得運用身體語言配合同盡量用咪高風。在日常生活習慣方面，多飲暖水，保持喉嚨及聲帶濕潤。平時要有充足嘅休息同睡眠，特別感冒嗰陣要畀喉嚨休息，避免清喉嚨或者大力咳嗽損害聲帶。另外，亦可以學習正確嘅頸部同肩部鬆弛運動，有助放鬆發聲嘅肌肉及聲帶，控制聲線。」
小麗驚嘆：「原來小美你識咁多嘢，突然覺得你好犀利啊！」小美答：「仲有最好就係唔好講人是非啦！」小麗問：「關咩事呢？是非就梗係細細聲講啦！」小美解釋：「因為專登壓低把聲細細聲咁講嘢都好傷條聲帶o架！」小麗說：「哎呀，唔好講呢啲衰嘢啦，好口渴，我哋去買水飲啦！」
職業安全健康局
www.oshc.org.hk