政情：貼文講工廈噪音 兩區議員疑爆私怨
唔少人因租金較平而租用工廈單位玩音樂。黃大仙區議員陳啟淳前日凌晨喺Facebook（Fb）貼文指自己選區新蒲崗中，某幢工廈內再有人半夜夾band，豈料貼文唔單止令關注樂隊發展人士同鄰近居民爆發罵戰，而同區區議員劉珈汶（Carmen）亦捲入罵戰中，究竟發生咩事呢？
劉珈汶被轟亂撥火
由於陳嘅貼文冇交代事件詳情，故惹嚟唔少網民留言批評陳疑打壓本地樂隊發展。Carmen尋晚亦喺Fb上轉發其他人對事件嘅睇法，並附上早年該黨就工廈發展提出嘅建議。但到尋日凌晨，佢突然喺另一個談及此事嘅貼文下留言，話「如果尊貴嘅議員冇曾經搵你哋協調傾傾佢，搵我，我都係黃大仙區議員」，並將留言截圖上載至Fb，指自己「唔錫身」。之但係，有網民批評佢未了解事件就出嚟撥火，亦有人質疑兩位區議員之間係咪有私怨。
Carmen接受查詢時話佢同陳一直無聯絡，又話工廈問題係需要由政策層面推動解決，所以先會分享該黨政策建議，但之後就有人喺個人Fb上對佢作出唔理性嘅批評並指佢「錫身」，所以先選擇公開回應有關言論。
而陳尋日下晝亦再貼文，重新組合事件嘅來龍去脈同過去點樣處理有關投訴，亦就自己較早前意氣用事及離地嘅留言向公眾致歉。佢話希望大家顧及他人感受，喺盡量唔滋擾到人嘅情況下繼續玩音樂。當問到佢同Carmen之間發生咩事時，佢就話唔回應喇喎。