新冠肺炎疫情持續逾一年，搞到百業蕭條，失業率亦不斷上升。政府喺疫情初期就曾勒令按摩業、美容業等行業停業，仲隨着疫情反覆不停咁停業復業。批發及零售界議員邵家輝就認為，有關場所自第3波爆發開始都冇出現感染個案，形容班業界唔病死都餓死，質疑仲係咪要繼續停業。其實有部分行業都提出過唔少防疫建議，希望可以有限度地復業，不過似乎政府都冇理過，遲早又搞到民怨大爆發就慘喇！
