中環出更：斥海洋公園重生計劃「垃圾」區議員：拆咗起公屋好過
連年虧損嘅海洋公園最近公布重生方案，計劃一出即劣評如潮，除惹來網民改舊歌諷刺，亦有區議員以垃圾嚟形容海洋公園嘅改革，擔心難逃倒閉嘅命運，建議不如拆咗個公園用嚟起公屋，以熊貓盈盈樂樂命名做紀念。
斥搞行山瑜伽本末倒置
海洋公園其中一項改革，係計劃將機動遊戲逐次收費，深水埗區議員何啟明尋日透過社交平台，認為呢個係愚蠢嘅做法。佢以小巴經營為例，指客滿開車，先至係最符合成本效益，假使玩海盜船係逐次收費，如果只得一個人排隊幫襯，園方難免吃虧，其實現時海洋公園嘅入場門票採取套餐式收費，遊客就算唔玩機動遊戲，園方亦冇損失。
至於海洋公園之前話要舉辦「森度遊」，包括「秘行南朗山」同埋喺園內做瑜伽。何啟明直斥呢啲活動同主題公園無關，簡直係本末倒置。佢認為主題樂園嘅主題先係吸引遊客入場嘅原因，但依家做埋晒啲同主題公園冇關嘅嘢，質疑瑜伽同行山，到底關海洋公園咩事呢？佢建議要發掘更多同海洋相關嘅元素。佢仲提到過往海洋公園都搞過具特色嘅活動，認為呢類活動係會吸引到市民入場，建議應該要再搞多啲。
何啟明又提到舊歌《前程錦繡》遭網民二次創作，當中有句歌詞提及園內熊貓「盈盈樂樂出年死於饑荒」。佢話再咁做落去，擔心歌詞會成真。既然依家有港鐵，不如起公屋惠及市民，建議叫做「盈盈樓」同埋「樂樂樓」。
卓妮