中環出更：民間互助抗疫 黃濤：港人非「人情薄如紙」
新冠肺炎疫情爆發至今已逾一年，政府抗疫不力惹民怨，幸好民間團結自救發揮互助精神，先至能夠緩解社會燃眉之急。「愛心工程」副主席黃濤（Carmen）話自疫情爆發後，身邊嘅朋友都一呼百應，願意捐出物資協助有需要人士，認為經此一役，更加證明香港人並非如外界所言「人情薄如紙」。
舊年疫情爆發初期，市面上嘅防疫物資供應極為緊張。Carmen話自己過去10年一直都有落區向有需要人士派發物資，但面對疫情自己都唔夠用，搞到要向身處外國嘅朋友求救。至於用剩嘅物資又點樣處理呢？佢話會呼籲朋友捐出物資，集腋成裘，然後再捐畀社區有需要的人。
對於外界成日話香港人「人情薄如紙」，Carmen認為香港人平時對捐贈物品有避忌，其實都只係怕畀人呃，或者唔確定有關物品係咪真係送到有需要嘅人手上，所以先會畀人一種冷漠嘅感覺喎。佢話依家身邊好多朋友都係一呼百應，願意出嚟幫手，證明香港人其實好有善心（口架）！
黃占永：分消毒用品畀朋友應急
Carmen尋日係響應一項義務活動，為一間非牟利機構進行消毒工作，消毒公司執行董事黃占永（Rambo）亦帶埋一班同事去幫手。Rambo回想舊年情況時，就慶幸公司廠房設喺新加坡，所以即使外地貨品運來香港受阻，但公司運作都冇受到影響，有時仲可以分到部分消毒用品畀朋友應急。佢又話今次所用嘅消毒藥水經過測試，已取得證明係對人畜無害。
面對疫情肆虐，從事消毒工作難免會有一定嘅風險。該消毒公司經理黎卓邦就話自己入行兩年，雖然遇上疫情，但都冇諗過要放棄呢份工，不過平日收工返到屋企，踏入家門之前都會先為衣服鞋履消毒。佢話上門為長者消毒家居，只要對方露出道謝嘅笑容，佢都會感到非常窩心，認為繼續從事呢份工作都係值得嘅！
卓妮