職場健康:長期重複手部動作 易致腱鞘炎

阿康問︰「阿健!最近見你做做吓嘢會摸住隻手,係咪有咩唔舒服?使唔使去睇醫生啊?」阿健回答︰「唔知係咪呢排多Deadline(死線)要趕?成日長時間用電腦,手腕同手臂有啲痛。」阿康說︰「呢啲係身體畀你嘅信號,因為長時間進行急速及重複動作,而造成手部及前臂嘅腱鞘炎。」阿健大驚︰「乜嘢炎話?聽落好嚴重咁嘅!」

保持良好姿勢多伸展

阿康解釋︰「腱鞘炎呀!腱即係俗稱嘅筋,係連接肌肉同骨嘅組織,而腱鞘即係筋膜,包圍住啲腱,有保護同潤滑功能,令腱可以順暢滑動。但若果長期做急速、重複或過度伸展嘅手部動作,例如操作鍵盤同滑鼠,手指經常郁動或者手腕過度屈曲,就有機會導致筋同筋膜因經常摩擦而發炎。其實做廚同清潔工作都比較大機會有呢種炎症。」

阿健說︰「咁我聽日就去睇醫生啦。」阿康回答︰「收工就快啲去睇醫生!如果你唔理佢,又唔改善吓啲工作姿勢、急速嘅動作同注意休息,炎症會惡化,疼痛會加劇添。總之,嚴重起嚟可能痛到你瞓得唔好,影響休息同日常生活。」阿健驚訝問︰「嘩!乜原來可以咁嚴重!係呢,健哥你都經常用電腦,但未見你提過對手有呢啲問題嘅,有乜嘢錦囊可以講嚟聽吓?」

阿康回答︰「其實我經常注意保持良好嘅工作姿勢,例如善用可調校高度嘅枱櫈嚟配合工作位置,將經常用嘅設備同文件盡量放近自己,咁就可以減少手臂過分伸展,同手腕屈曲等不良嘅姿勢。仲有幾忙都要畀對手休息吓,同埋可以做啲手部伸展運動嚟紓緩吓添!」阿健說︰「收到!以後會留意工作姿勢,多休息吓同做放鬆手部運動。咁我去睇醫生先!」

職業安全健康局

www.oshc.org.hk

第一手消息請下載on.cc東網iPhone/iPad/Android/Windows Phone Apps