中環出更：梁凱瑩享受親子 陪伴成長人生樂事
香港生育率不斷下降嘅原因有好多，有人認為養大一個小朋友要花幾百萬，亦有人擔心兩公婆為口奔馳，冇時間精神怕唔識教。城市女青年商會會長梁凱瑩（Jojo）就話唔應該諗得咁負面，其實只要懂得箇中道理，陪伴小朋友成長絕對係一件人生樂事嚟o架。
城市女青年商會早前舉行就職儀式，新任會長Jojo指今屆計劃嘅活動，會着重親子同教育小朋友方面，因為現今好多父母都將學業成績睇得太重，忽略聆聽小朋友嘅心聲，久而久之同子女嘅關係變差，佢聽過有家長因疫情下小朋友唔使返學，相處時間突然多咗，反而擔心唔知點同小朋友相處。有兩個小朋友嘅Jojo就話自己幾忙都好，每晚都會陪鍾意閱讀嘅大女睇故事書、傾吓同學習無關嘅日常事，讀書方面就搵少啲課本操練且多着重活動學習嘅學校，雖然要贏在起跑線，但Jojo認為快樂成長都好重要，識得將學識靈活運用喺日常生活上，比起「死讀書」更能令小朋友得益。
該會嘅副會長黃翠玲（Tracy），就話有人會覺得湊小朋友係一件「苦差」，但佢就好期待去接受呢份苦差喎，因為佢家姐同三個子女嘅融洽相處，話畀佢知湊細路絕對係一件樂事。Tracy話佢家姐湊細路，難免有勞氣嘅時候，但小朋友做得啱就一定會讚佢哋，而小朋友又識得氹番媽咪，成件事好溫馨。Tracy覺得中國人比較內斂，好少會開口讚仔女，其實小朋友係需要適當嘅讚賞去獲得認同o架。
李麗瑩：不應太依賴外傭
另一位副會長李麗瑩，就指時下嘅事業女性都專心為事業打拚，但講到陪伴小朋友成長，唔應該太依賴別人例如外傭姐姐，因為小朋友會學習照顧佢嘅大人，況且小朋友成長期好短暫，錯過就追唔番，若果仔女嘅童年回憶裏面冇自己份就唔好喇。
卓妮