中環出更：師生寒天照沖凍水涼 陳兆焯：人生非只求舒適

天寒地凍沖凍水涼，會唔會擔心凍親生病呢？陳校長話沖凍水涼就同游冬泳一樣，事後只會渾身發熱，只要唔好吹風，沖凍水涼係唔會凍親嘅，而正生書院廿幾年來，都冇人因凍水涼而生病。但考慮到女性嘅生理狀況，陳校長話氣溫一旦低過攝氏15度，女同學沖涼可申請熱水，之不過校內嘅一眾同學都冇話畏縮，都甘受寒天澆冷水嘅磨練。雖然校舍欠缺暖氣供應，但有同學趁課餘時間學習編織技巧。陳校長話唔好以為男同學就必定唔擅長編織，睇吓佢哋織出嘅冷帽同冷口罩，不但令人感到陣陣暖意，又顯出無限創意。

張樹槐：無懼寒風照練跑

雖然上周五係16年來最寒冷嘅元旦日，但人稱「水哥」嘅長跑達人張樹槐就無懼颼颼寒風，來回山頂及半山區練跑。水哥話匿喺被窩裏面無疑係相當溫暖，不過既然係新一年嘅開始，好習慣必須要堅持，況且平日忙於上班，一有練跑嘅機會，就唔應該因怕凍而退縮。水哥認為喺寒風中迎難而上，當跑完自訂目標嘅一刻，成功感就會油然而生。而水哥試過最凍嘅環境練跑，就係三年多前喺加拿大嘅黃刀鎮，佢話計埋風速，當時只得攝氏負20度！

陳兆焯認為人生並非只求舒適，主張同學接受沖凍水涼嘅挑戰。	張樹槐元旦日練跑，話好習慣必須要堅持。	黃英鵬話冬天從事水上活動，切忌喺岸上躊躇。

喜愛水上活動嘅保良局前總理黃英鵬（Simy），都試過冬天之下去滑水。Simy話嚴冬從事水上活動需克服怕凍嘅心理障礙，若果喺岸上躊躇就好容易會畏縮。由於人體係會不斷郁動，所以就算置身低水溫都會好快適應。雖然Simy相信冬天落水好講求意志力，但若果患有心臟病的話，就要小心啲啦。

卓妮