中環出更：聞老人家苦況激發 程俊華生產口罩幫人
所謂生命影響生命，只要係善心嘅人，就好容易因為其他人嘅一句說話觸動，繼而就做到好多可以幫到人嘅事，有時候可能連自己都估唔到個回響咁大添！
話說香港工業總會前排喺社交媒體專頁上載咗幾條新出爐嘅2020年香港青年工業家得主影片，得主之一嘅程俊華（Tommy）就正正分享咗個人影響人嘅故事。原來疫情初期，全民都好缺乏防疫物資嘅時候，有次Tommy去社區幫手派搓手液，有個太太行埋去問佢有冇口罩派，仲話自己屋企有個老人家，因為冇口罩戴，已經成兩個月冇出門口。
Tommy憶述番當時聽到覺得好震撼，亦好觸動到佢，而本身做開酒店衞生用品嘅佢，就更加想用本身多條生產線嘅資源，加快生產防疫物資回饋社會。咁又係呀，喺全城冇罩嘅時候送口罩畀人，受惠者真係會開心到好似喺沙漠見到綠洲水泉咁。
另一個得主、從事家電行業嘅俞國偉（Wayne）就興趣多多，喺正職之外，仲好鍾意畫油畫同研究點沖一杯好飲嘅咖啡添！唔好以為Wayne只係玩玩吓，佢啲畫專業到可以開畫展，而沖咖啡都沖到變咖啡師添！話時話，可能正如Wayne咁講，工業同藝術都係講求創意，而沖咖啡亦同佢從事嘅製造業一樣，每個程序都講求專業同嚴謹，令Wayne喺業餘放鬆之餘，都可以訓練自己工作嘅敏銳觸覺同習慣。
吳民卓：現代社會要不斷求變
至於從事電子業嘅得主吳民卓（Alfred）就好重視科研，喺佢嘅字典入面，墨守成規係變相退步，佢覺得想喺現代社會立足，就要不斷求變、不斷創新，唔係就會畀時代變遷追上。可能正正因為咁，Alfred都好願意資助本地大學嘅科研項目，畀年輕人有發圍嘅空間呀！
卓妮