中環出更：葉問徒孫 楊永勣：受電影刺激習武多失敗
銀幕上武打明星嘅不凡身手，的確會惹起好多人對中國武術嘅興趣。詠春一代宗師葉問嘅徒孫楊永勣，就指電影同現實，往往存在落差，若果係受到功夫電影嘅刺激，然後就去拜師學武的話，恐怕會失望而回。
日前楊永勣聯同划艇運動員李嘉文，為香港善德基金會拍攝「善德全民線上運動月」嘅節目。期間楊提到，佢示範嘅詠春入門動作都係「企定定」嘅，初學者若果專注練習500小時，對詠春嘅招式應該頗為熟練，不過要去到揮灑自如、能顯出個人風格嘅地步，1,000小時以上嘅練習就走唔甩啦！楊強調，習武之人同運動員一樣，要追求動作嘅穩定性，就必須反覆苦練。至於勤練詠春招式，又可唔可以達到減肥瘦身嘅效果呢？楊坦言唔得，佢話單靠做運動嚟燒脂其實好辛苦，只要節制食量就可以控制體重。雖然無助減肥，但楊認為學習詠春至少可以提升手腳協調，同增強平衡力，又可以鍛煉肌肉防止寒背，無論或站或坐腰骨都保持挺直，人望落都零舍精神。
李嘉文話做運動要多元化
曾參加過兩次奧運會嘅李嘉文，今次嘅詠春初接觸，就隨楊永勣學習套路「小念頭」。事後李嘉文話學詠春較想像中困難，因要牢記動作方位同次序，不過今次學習詠春動作，先至發覺左邊身軀唔夠靈活，從而意識到自己平時練習以右手居多。李嘉文又指除咗自己專長嘅划艇，其他嘅運動訓練，如舉重、跑步、單車同游水亦唔可以忽略。佢話運動要多元化，身體同腦筋先至會更靈活，以及減低受傷嘅機會。
平時有練習太極拳嘅香港善德基金會副主席王亞明就認為掌握正確招式，對鍛煉身體而言相當重要。王話自己因患上脊椎炎，不宜進行過於劇烈嘅運動，而動作比較溫和嘅太極拳就正合所需。儘管學太極拳有一段時間，王要完全掌握楊氏太極拳所有招式仍有一段距離，不過佢話寧願畀啲耐性慢慢學，點都好過學壞姿勢咁話。
卓妮