中環出更：洪福邨紅葉枯萎 房署被轟管理不善
每到紅葉季節，元朗大棠都人頭湧湧。其實同樣都喺元朗，洪福邨亦有紅葉睇，但係當區區議員批評房屋署管理不善，旨意用「燒鴨價錢」嘅管理合約，食出「燒鵝嘅味道」，令邨內樹木出現健康問題。
洪福邨洪欣、洪盛樓有幾棵楓香樹，品種同大棠紅葉一樣。元朗洪福區議員陳樹暉最近喺社交網站發文，分享依家應該係楓香轉黃嘅時間，但洪福嘅楓香別具特色，竟然變禿、變灰，明顯出現健康問題。
僅得兩位花王 工作吃力
陳樹暉話房屋署有委託樹藝公司定期檢查邨內樹木，但又交由管理處負責日常管理，而全邨只係得兩位花王，工作非常吃力。陳批評房屋署期望可以用「燒鴨價錢」嘅管理合約，食出「燒鵝嘅味道」。佢建議應該喺管理合約上加碼，令管理公司有更多資源同人手打理園境，又或者直接招標聘用園藝公司作專門管理。
本報就有關事件向房屋署查詢，回覆話洪福邨辦事處有員工，負責處理日常園藝同樹木保養，而房屋署樹木管理及園藝分組亦會提供技術意見同指引。署方又話洪福邨內嘅植物大致生長正常，會繼續評估生長情況同作出適時跟進喎。
卓妮