中環出更：王百羽爆區議員照訂內地月曆

早前油尖旺區議會印製嘅新年賀品上，有「追求民主自由」字眼，聲稱被內地海關扣查，令人聯想起泛民明明成日將「黃色經濟圈」掛喺嘴邊，點解會幫襯內地廠商呢。無獨有偶，王百羽原本諗住喺社交網站訴苦，話訂製咗一批月曆，但其後就被內地海關扣查，搞到依家都冇月曆派。

網民寸「咬咗糧支變建制」

但網民就留意到另一個重點，事關王百羽話全港好多區議員嘅賀年印刷品都被內地海關扣查，不禁鬧爆泛民參選時，又話誓撐本土黃色經濟圈，拒用國貨，但當選後話咁快就「咬咗糧支變建制」，識得喺內地印月曆，仲要篤爆其他「泛暴」議員撐國貨添！有網民寸爆因為內地印刷費用平，就可以報大數，自己袋多啲錢，質疑口口聲聲爭取民主，到最後都係為自己利益，而冇分顏色啊。

再講，王百羽等人因早前申報立法會選舉開支489萬港元，涉嫌串謀詐騙被捕。警方亦喺王位於元朗嘅住所搜出大量仿製武器，包括8支仿製長槍、17支仿製手槍同仿製彈藥等，向佢加控「管有仿製火器及彈藥」罪。

卓妮