中環出更：期待穿刺繡旗袍 羅詠詩恨飲新抱茶
中華文化雖淵遠流長，但經常面臨青黃不接嘅危機，所以文化保育工作係非常重要。百仁基金副會長羅詠詩（Anthea）一直對中華文化好感興趣，包括舞火龍、兒童粵劇等，佢話為粵劇表演化妝要用幾個鐘，若果小朋友肯坐定定，已經證明佢哋好認真看待粵劇呢回事，而Anthea都致力推廣有關文化。
事關卓妮早前喺銅鑼灣，見到Anthea喺一間舖頭入面欣賞緊刺繡手工藝品，要同佢傾偈先知，佢一直鍾情於刺繡，仲有一個小小嘅遺憾添啊。原來Anthea當年結婚已經想搵個師傅喺旗袍上刺繡，但嗰刻先發現原來喺香港搵刺繡師傅好困難，惟有期待自己飲新抱茶嗰陣再彌補遺憾咁話啊。
史立德籲開拓內地市場
聖誕佳節將至，撞到中華廠商聯合會（廠商會）副會長盧金榮（Wingco）喺銅鑼灣購物。Wingco話往年聖誕節都會一家去旅行、滑雪，過一個白色聖誕，可惜今年受疫情影響，要乖乖哋留喺香港。Wingco慨嘆受禁聚令限制，一家出去食飯都唔容許，只可以喺屋企開飯喇。雖然節日氣氛有所欠奉，但Wingco都專程物色聖誕禮物，氹老婆開心啊。
各行各業都受疫情打擊，廠商會候任會長史立德（Allen）就去街頭了解一下市況，佢話目前最受影響嘅就係餐飲業，之不過都毋須太絕望，因為飲食係日常需求，只要有充足資本，捱過疫情之後，相信餐飲將會係最快復甦嘅行業。Allen亦寄語一班生意人，應該考慮開拓內地市場，皆因人均消費能力比香港高，而且亦一早克服疫情嘅陰霾。而佢自己因為疫情，已經成年冇去過內地工廠巡視，要逼自己學識放心，靠內地嘅同事睇實工廠運作喇。
卓妮