審計署幾乎年年都炮轟香港郵政管理混亂同經營無方，可謂衰到貼地，淨係睇盤數都知，事關營運基金連續見紅，虧蝕幾億元。點樣止蝕？原來係以較低工資嘅合約員工取代公務員負責街箱收信，同埋以時薪聘用退休郵差進行派件，班現職員工鬧爆署方冇諮詢就外判服務兼帶頭製造廉價勞工。話時話，署長朱曼鈴諗到呢啲花招，都係想掩住審計署把口，起碼話佢有做嘢改善下，但對虧蝕呢個黑洞嚟講，似乎就止唔到血，盤數點整都唔會靚喇！
