中環出更：張孝威：綠色建築講究「風水」
中國傳統嘅理想居所，必須配合風水布局。而源於西方環保觀念嘅綠色建築，除咗講求建築設計過程、施工期、入伙後是否符合環保準則之外，其實都要講求「有風有水」，香港綠色建築議會主席張孝威話雖則時代進步，但綠色建築確實同「風水」有關o架！
原來張孝威講緊嘅係，綠色建築為咗達致室內通爽，會充分利用周遭嘅天然風；為節省用水亦會收集天降嘅甘霖，所以的確會顧慮到「風水」啊。之不過，張孝威話自己居住嘅大廈樓齡比較大，並無太多綠色嘅配套，惟有喺日常生活入手，致力減碳節能。張孝威話要加強推廣綠色建築概念，特別針對小朋友，因為佢哋係未來嘅主人翁！容許小朋友透過比賽，天馬行空咁構思綠色建築，講唔定將來嘅科技可以落實有關嘅設計o架！
葉頌文：連結社區嘅重要橋樑
香港建築中心主席、傑出青年葉頌文（Tony），指唔少新建樓宇都開始加入綠色元素，例如植物同埋空中花園。Tony認為綠色建築不止於通風同美觀，更係連結社區嘅重要橋樑，而空中花園可以畀居民以合理嘅價錢分租田地，創造一個舒適嘅公共空間，居民可以自己親手種植，有得玩仲有得食添，自然就更加凝聚到一個環保嘅社區啦！對於外國有建築物種滿植物，Tony表示唔可以將外國空中花園嘅設計照辦煮碗搬嚟香港，綠色建築都要在地化，選擇適合嘅栽種物，咁先唔會造成蚊蟲為患。Tony指自己喺辦公室都會種一啲葉面比較厚大嘅植物，咁就唔需要經常淋水，易打理之餘又唔驚惹蚊啦。
張孝威同葉頌文日前出席「香港綠色建築週2020」嘅活動，本身係教師嘅親子專頁「童你去玩」創辦人林曉瑩（Loretta）亦有分享環保生活習慣。Loretta認為環保並非「唔做一樣嘢」，而係一個意念。雖然搭飛機少不免會有碳排放，不過一家人去吓長途旅行，畀小朋友親身體驗外國嘅環保文化，例如有啲國家要求市民進行垃圾分類嘅做法，都好值得港人學習。
卓妮