顏卓彬緊握現在 最緊要無悔

今季重返傑志的顏卓彬，自10歲起加入傑志青訓系統，2015至16年球季與羅梓駿、鄭展龍等「藍鳥」，一同被提拔上一隊，首季隨即獲得12次出場機會。奈何翌季球隊換帥，他的上陣次數變得寥寥可數，除因為當時正準備DSE而分身不暇外，他亦自覺進步緩慢，不獲派上場亦可以理解。「始終機會唔一定要畀我，我都要自己爭取，冇得怪教練，惟有繼續喺啲大哥身上學嘢。」

美國受訓提升身體質素

「彬仔」當年考獲的成績未及升讀本地大學的門檻，令他把心一橫赴美升學，「諗住博去美國嗱嗱聲讀晒4年，始終想盡快踢全職。」這個決定甚至令他婉拒了時任夢想FC主帥梁志榮的邀請，決心出外闖一闖。首2年，「彬仔」就讀位於堪薩斯州的中美拿撒勒大學，本以為當地校園足球的水平不高，但原來程度竟高得出乎意料之外：「嗰邊有隊友踢過歐洲國家U隊或者大球會青年軍，而且設備都好齊全，反而喺嗰度都幫我建立到啲嘢，起碼身體質素好咗好多。」

2年間，「彬仔」平均一季上陣20場，更曾為學校打入全國賽。雖然不乏出場機會，但他希望轉戰更高水平的賽事，繼續尋求進步，去年毅然轉讀屬於NCAA第1級別的聖文德大學，這亦是港隊代表杜國榆的母校。「彬仔」指，過去一季在新學校即使贏得不多，但因為球隊在比賽中很多時處於下風，打逆境波對他來說，也成為一種磨練。

總括3年負笈美國的經歷，「彬仔」的收穫比預期中豐富，但相比起同期出道的「龍仔」和「羅梓」，這幾年在港超聯累積的經驗和名氣，他卻顯得稍遜一籌。而旁人亦會經常假設，如果當初「彬仔」沒有出外，如今他又會否已經闖出一片天呢？這個問題早幾年也曾一度纏繞着他，但「彬仔」自言既然費煞思量都沒有結果，倒不如把握時間訓練，不要讓自己留有後悔的空間：「如果唔努力，之前做嘅所有嘢都會白費，呢個係我諗咗好耐得出嚟嘅答案。」

唔妒忌藍鳥同窗「98仔」

在這批傑志「98仔」之中，相信讀者仍記得在2018年「亞冠盃」，對柏雷素爾一戰一球成名的鄭展龍，卻將同期出道的顏卓彬拋諸腦後。對此，「彬仔」不但沒有對同窗的成功帶半點妒忌，反而為好友一鳴驚人感到欣慰：「我好記得嗰朝我喺美國教緊波，突然電話不停震，唔同群組都話『阿龍』入波，我即刻睇直播！嗰刻情緒都好激動，因為佢始終係我兄弟，呢球波都叫為我哋爭一口氣。」圖/文：黃雋謙