中環出更：教材委員會結束拉鋸戰 容海恩火速當選主席
近年唔少教材都被質疑含誤導同埋偏頗，立法會喺上一立法年度成立咗「研究幼稚園、中小學教科書及教材編製小組委員會」處理，但就一直受拉布拖延影響而未能選出主席。最近因應民主派議員總辭兼缺席會議，唔少會議都暢順進行，其中呢個委員會亦經歷5次會議後，終於都選到主席喇，由新民黨容海恩喺冇競爭下當選。
依個委員會喺上一立法年度成立，但喺之前嘅4次會議上就由街工前議員梁耀忠主持主席選舉，點知一路都選唔成。尋日就係委員會喺今個立法年度嘅首次會議，當初提議成立依個委員會嘅容海恩就自動當選，之後佢仲話「經過5次會終於選到主席啦」。
檢查人員被質疑有政治偏向
委員會之後繼續開會，議員梁美芬就話有教材出版商反映，指如果喺教材內冇加入反對政府嘅意見，審查時會被教育局記入黑名單，質疑局方負責檢查教材的人員有明顯的政治偏向。
議員鄭松泰批評，教育局冇向公眾交代教材評審小組嘅成員委任，認為佢哋有需要出席會議，又形容建制派監察教師教學係文革工程。議員郭偉强就話民主派議員「話走就走」可以辭任，但喺上年示威被捕嘅學生就要面對刑責。容海恩就話有議員用詞偏激，下次會議若再有出現會作出警惕。
卓妮