政情：梁家榮一味扮聾 陳建強叫咪龜縮
年花10億元公帑嘅香港電台經常被批評節目立場偏頗，廣播處長梁家榮表現劣評如潮，外界一直有聲音叫政府將佢炒魷。自稱「約章陳」嘅港台顧問委員會前主席陳建強日前就鬧爆，梁家榮喺實行港台約章上有嚴重落差，又批評佢唔肯面對公眾。梁家榮任期於明年約滿，雖然唔打算續約，但都唔代表可以懶懶閒㗎！
約章陳早排先卸任主席一職，日前出席議員葛珮帆（EQ）嘅網台節目時，提到顧委會嘅工作係支持廣播處長做好港台約章嘅公共使命，向廣播處長提交意見，唔係處理投訴個案。對於梁家榮嘅表現，陳建強就直斥梁喺落實約章方面有嚴重落差，仲提到喺上年9月至11月中，唔少節目都犯下同一錯誤，質疑梁係咪有疏忽。
曾向梁反映 獲回覆要低調
唔單止咁，約章陳仲批評梁家榮唔肯面對公眾，好多時都係由港台機構傳訊組總監伍曼儀面對。佢話以前曾經向梁家榮反映，但梁家榮就回覆話作為傳媒應該要低調，唔係每次開會都要邀請傳媒。約章陳坦言，對梁家榮嘅說法不敢苟同，同埋覺得好保留，又話社會上唔同嘅聲音，即使有反對聲音都唔可以對沖。
一向關注港台事務嘅EQ就話港台作為公營機構，市民係期待節目係有質素同埋持平，唔係偏幫，仲鬧爆港台依家係「無王管」。過往佢都有喺立法會上向梁家榮提出質詢，話收到唔少關於港台節目嘅投訴，但梁就話讚賞節目嘅數量比投訴多，所以唔使處理投訴。佢仲質疑梁家榮嘅工作，認為梁若未能管理，政府應開除梁。
涉宣揚港獨 被斥離晒大譜
EQ仲直斥梁家榮「離晒大譜」，話作為公營機構應擁護《基本法》，唔係喺節目中宣揚港獨。佢認為即使顧委會已向梁家榮提供意見，但梁就借咗「聾耳陳隻耳」，唔聽意見同時亦冇採取行動，喺港台節目《鏗鏘集》女編導蔡玉玲被捕一事上只係識盲撐。約章陳都認同，仲話梁家榮作為總編輯，應要對每個節目負責，質疑佢有冇就員工索取資料作訪問一事訂下準則、翻看節目等。