中環出更：圍警總案開審前夕 黃之鋒發文認罪預坐監
已解散嘅前香港眾志秘書長黃之鋒、主席林朗彥同成員周庭，被控喺舊年6月21日包圍灣仔警察總部，涉嫌煽惑他人明知而參與未經批准集結等3罪。周庭早前已承認兩罪，惟黃、林則唔認罪，案件今日開審。而喺開審前夕，黃之鋒尋晚喺FacebooK（Fb）貼文，話喺檢視控方證供並徵詢律師意見後，佢同林都決定承認所有控罪，又坦言唔排除需要即時入獄。
黃之鋒話，承認所有控罪後，今日法庭聆訊將會跳過審訊階段，唔會傳召證人同爭議案情，直接進入結案陳詞，又坦言若果佢哋被判處即時監禁，亦唔係好意外，但佢嘅心情不免仲係會有啲忐忑，但又話即使身處牢房，仍會發表獄中書簡，亦歡迎外界寄信畀佢喎。
稱國安法生效逾百日仍未起訴
佢又話喺《港區國安法》刊憲至今百多日，佢仍未因而被拘捕同起訴，形容某程度上已經算係一種奇迹，亦因而令佢對還押嘅「手足」，仲有12位身處鹽田看守所嘅香港人，感到有啲內疚喎。黃之鋒咁講，唔知係咪質疑執法部門點解到依家都唔拘捕佢呢？
周庭尋晚亦喺Fb話，如果今日被判入獄，將會喺佢人生第一次坐監，雖然話已有心理準備，但都係有啲害怕。
卓妮