中環出更：內地升學大趨勢 彭徐美雲籲港青多闖蕩
「同學各位找個位，這是你的畢業禮」，每年到咗呢個月份，除咗係大學生嘅畢業季節之外，仲係唔少中六考生報大學嘅時間，其實近年考生升學嘅選擇多咗好多，如果唔想去到歐美加等地咁遠，鄰近嘅內地同台灣都多咗考生選擇，卓妮日前去咗個升學講座，仲有啲曾經去外地升學嘅大師姐分享經驗，聽吓佢哋點講。
港區婦聯代表聯誼會（港區婦聯）會長彭徐美雲就話，自己以前去美國讀書，眼界同見識的確增長不少。不過，依家時代唔同，覺得內地發展空間比較大，仲話「讀萬卷書不如行萬里路」呢句說話好有道理，呼籲時下嘅考生可以放開心胸，去吸收同接納每個地方嘅新事物，相信對個人成長同發展一定會有裨益。
同場嘅香港廣西婦女聯會主席彭芷君（Gigi）就話，記得自己13歲之時，父母帶佢第一次到境外學校參觀，地點唔係歐美國家，反而係內地嘅桂林。Gigi話印象好深刻嘅係父母同佢講，佢生喺香港，日後大把機會到海外接受西方教育，但佢始終係華人，所以都想佢先了解自己嘅根，他朝去到外國留學都唔會忘記自己嘅身份咁話。
鄭媛文：跳出舒適圈衝出香港
至於港區婦聯青年事務委員會分管副會長陳曼琪（Maggie）就覺得，港青去內地發展將係未來嘅大勢所趨，好鼓勵年輕人去內地升學、就業或生活，早一步建立當地嘅人脈同適應文化。過去曾到內地升學嘅港青鄭媛文（Kiki）就話，其實當年考完公開試，同時有收到本地大學同內地大學嘅取錄通知，雖然嗰時身邊好多朋友都叫佢留喺香港讀書，但佢最後都係想跳出舒適圈，衝出香港去異地闖下。
依家回想，Kiki覺得自己當時嘅決定冇揀錯，因為喺北京著名嘅大學讀書，先會激發自己體驗到喺冬天寒風下，清晨5、6點排隊入圖書館溫書，同埋喺零下10幾度嘅低溫下，喺戶外等半個鐘巴士去幫人補習賺零用錢啊。
卓妮