政情：財會議案速撤讓路 明日大嶼好快殺到

新冠肺炎重創本港經濟，政府預告今年度預算赤字將擴大至逾3,000億元，財政儲備會跌至8,000幾億元，相當於12至13個月政府開支，而庫房未來幾年都要見紅。之不過，政府一直希望強推明日大嶼填海計劃，仲話估算造價只需6,240億元；惟觀乎政府嘅往績，過去多項工程都係大超支，各界普遍相信實際造價將破一萬億元。

上個立法年度結束前，財委會尚有13個項目未完成處理，原本會隨住第6屆立法會任期完結而「自然死亡」。不過，隨住立法會延任，涉款5.5億元嘅明日大嶼前期研究項目「死過番生」，聯同另外11個項目再交上財委會處理。

泛民總辭 審議速度加快

尋日係民主派「總辭」後首次召開財委會，主席陳健波就形容今時唔同往日，議會已經減少辱罵或不講道理嘅發言。睇番依個「新議會常態」，審議速度明顯快咗好多，就財政司司長辦公室嘅開位建議，尋日只喺兩名建制派議員發言後，即交付表決並獲通過。陳就解釋，話因為之前已經審議咗5個鐘喎。

會議隨即進入討論商經局兩個編外職位嘅保留問題，會上多名建制派議員表示，喺目前經濟情況下，政府都要壓縮開支，唔可以胡亂開位。無錯啊，財赤下更應審慎理財，例如明日大嶼呢啲倒錢落海嘅項目就唔應該支持喇！

建制派倘再錯 難搵藉口

但傾咗唔夠個半鐘，當局就急急腳撤回有關項目。睇番財經事務及庫務局喺上月30日財委會開會前，突然撤回一個議項，以及上周五環境局撤回一個首長級丙級政務官編外職位轉為常額嘅職位申請，當時會上就有民主派議員鬧爆政府係想加快審議明日大嶼項目。咁唔知政府今次係咪打緊同一個如意算盤？

另外，尋日嘅財委會會議原定下晝3點召開，但建制派為譴責泛民「總辭」，令遲咗15分鐘先舉行。議會冇咗泛民後，通過議案嘅阻力無疑係大減，但市民將會更加放大建制派嘅一舉一動，好難再搵藉口抵賴。依家財赤咁嚴重，若果唔想成為香港嘅歷史罪人的話，未來真係要三思而行喇！