政情：黃友嘉明年出任教大校董會主席
政府尋日公布，委任積金局主席黃友嘉為香港教育大學校董會主席，接替服務教大校董會僅3年嘅馬時亨，明年1月1日起生效，任期3年。今年63歲嘅黃友嘉亦係基本法推廣督導委員會及外匯基金諮詢委員會委員，以及行政長官創新及策略發展顧問團成員。香港教育大學歡迎有關任命，校長張仁良表示，有信心憑黃嘅豐富公共服務經驗帶領教大繼續邁步向前。
至於現任教大校董會主席馬時亨，係於2017年4月開始其職務，今年4月因個人原因，稱未能接受續任多3年，其後再度接受委任約8個月至今年12月31日。
葉芷琳當選港大校委會本科生代表
另外，一連3日嘅港大校委會本科生代表選舉，學生會會長葉芷琳尋日以1,816票擊敗只取得67票嘅港大4年級生麥嘉晉，當選校委會本科生代表。葉將接替現任代表李梓成，於11月16日履新，任期一年。
港大校委會為港大最高管治機關。葉芷琳對今次成功當選感到榮幸，承諾未來會喺校委內擔起為港大師生發聲嘅重任，又稱上任後會在校委會內表達對院長遴選機制改革、港大深圳醫院債務等問題嘅關注，並希望邀請校長張翔同兩位新上任嘅副校長申作軍同宮鵬，舉行公開論壇與學生會面。