中環出更：立會新形勢 議員促政府咪Hea答
泛民主派議員日前宣布總辭，建制派全面主導立法會。有建制派議員尋日喺內務委員會上指出，過往有議員開會太聚焦政治問題，但現時立法會有新形勢，政府亦應再準備充足，唔應該再以「Hea答」嘅態度嚟回應議員。
漁農界議員何俊賢指，過往不論立法會大會抑或事務委員會，往往喺處理政治問題上面浪費咗唔少會議時間，認為現時立法會出現新形勢、新狀態，應該要聚焦喺民生，建議政務司司長張建宗同10多名局長開會，要求出席立法會會議時應準備充足，唔好「Hea答」或答非所問，要有效運用議會時間。
處理疫情應快狠準
面對新冠肺炎疫情影響，多名議員要求政府在處理疫情上應快、狠、準，喺強制全民檢測方面切勿再拖拖拉拉。紡織及製衣界議員鍾國斌就認為，政府嘅防疫抗疫基金應有餘款，建議政府應將餘款撥予其他行業，例如進出口業同旅遊業等未有得到太多幫助嘅行業。
卓妮