落成至今已經55年嘅大坑西邨，樓宇殘舊設施老化，早年雖獲城規會有條件通過重建。然而礙於種種原因，重建一事延宕多時亦無進展，因此有關注基層住屋嘅團體，要求政府落實舊年施政報告嘅建議，運用《收回土地條例》重建大坑西邨，而啟動重建工程之前，邨內嘅空置單位仲可以當作過渡性房屋，畀劏房戶暫時遷入。政府成日都話欠缺土地，其實盡早解決大坑西邨嘅重建問題，基層上樓咪唔使等咁耐囉，運輸及房屋局局長陳帆好快啲做嘢啦，唔好側側膊呀。
