中環出更：葛珮帆證無新冠 過勞感冒須休息
日前病倒嘅議員葛珮帆（EQ），尋日喺社交平台報平安。佢話對新冠肺炎病毒檢測結果呈陰性，即係無染疫，多謝大家關心同慰問，又話知道自己唔係鐵人，會着重休息同調節工作。
中醫話EQ只係操勞過度同感冒，而佢話尋日呼吸都已經唔痛，只係覺得身體有啲虛弱，冇氣冇力，希望再唞多兩日就會好番。
EQ又話睇到有網民心地唔好，咒佢全家，不過佢就無嬲喇，反而叫嗰位網民積吓口德，因為黑心唔會有好報。
網民貼心獻治療偏方
喺呢個貼文出街後，唔少網民知道EQ冇中招都放下心頭大石，紛紛留言叫佢多啲休息，唔好咁操勞；亦有網友提醒，話依家流感高峰期，叫佢若果再有唔舒服嘅話，就要再去檢測多次，唔好怕麻煩，有啲網友仲提咗啲治感冒不適嘅偏方畀佢添！
話說EQ上個禮拜四喺社交平台貼文，話自己早兩日開始鼻塞、頭痛，就連呼吸都覺得痛，仲有發燒。雖然之後退咗燒，但就周身痛，佢穩陣起見就做咗病毒測試，同埋留喺屋企等結果。
卓妮