政情：港島環島徑 遲遲未貫通 部門卸膊各自為政

中區區議員黃健菁、東區區議員鄭達鴻同趙家賢，以及灣仔區議會主席楊雪盈等人，尋日喺筲箕灣海濱會見傳媒，指港島4區早前共同動議，要求政府將現有海濱長廊同行人道連貫起嚟，組成65公里長嘅環島徑，屆時沿途將會有70幾個景點，畀港島市民可以享受沿海景色，動議仲獲得跨區同跨黨派支持，促請民政事務局等相關部門能盡快協調，連接各路段之餘，完善沿途配套，好似增設無障礙同寵物友善路線、增加座椅同水機等。

冇專門政策局協調統籌

但就有區議員認為政府喺處理同推動環島徑過程中，冇專門政策局協調統籌，搞到事件多年來毫無進展。東區區議會、規劃工程及房屋事務委員會主席鄭達鴻話，由於動議獲得跨黨派支持，理論上政府必須處理有關動議，而且呢件事唔係新嘢，過去一直都有講，好似西灣河水警總區總部租借近26年都未歸還，導致無法貫通筲箕灣及鰂魚涌海濱，促盡快覓地搬遷。

鄭又話政府要落實推展就一定要聆聽區會意見，或提出更好嘅發展目標，大家深入討論，而唔係不聞不問。

政府不作為 拖延興建

佢舉例指，區議會曾去信發展局，但局方就「卸膊」指某範圍屬於康文署管理，暫時無整合性嘅回覆，無政策上嘅支持，進展相當慢，要兜好大個圈，自己去逐一敲門（行政部門），直斥政府不作為必然拖延所有民生政策同環島海濱長廊嘅建成。

東區區議會副主席趙家賢同樣都話政府欠缺「整合」，現時喺無政策局嘅主導下，官員出席區議會會議時都無法提供一個確切回覆，項目就停滯不前。仲話過去一直提出希望喺筲箕灣海防博物館闢設一條行人徑，令筲箕灣愛秩序灣海濱花園可向東伸延至杏花邨，居民唔使冒險行公路前往，但民政事務局局長同康文署一直以嚟都無合作，部門各自為政。

咁睇法，不但政府政策差，就連部門之間都零合作，又點可能做得好件事？民政事務局局長徐英偉同康文署署長劉明光真係要反省一吓，唔好再推嚟推去，快啲合作搞好個環島徑便利市民啦！