動物慘案陸續來 司底驊助紂為虐

沒有最拙劣,只有更拙劣!沒有最變態,只有更變態!各位街坊,功夫茶忽然百感交集,皆因見到被外界炮轟為「避政司司長」嘅律政司司長鄭若驊,其民望繼續「墊司底」,最新一份民意調查顯示只得十九點三分,被評為表現拙劣,評分繼續係三司中最低。講真,司底驊民望長期食泥,大家都預咗亦不會詫異,之不過佢食泥唔緊要,最慘就係佢不作為兼亂撤控,助長虐待動物歪風吖!

嗱!元朗日前有一名變態老翁徒手挖狗屍掏內臟,涉虐待動物被捕;同日區內又發生另一宗駭人聽聞嘅虐狗案,一名清潔工喺元朗一個垃圾回收站嘅垃圾桶內,發現一隻嘴及後肢被電工膠帶綑綁嘅唐狗女,奄奄一息,發出哀鳴!經獸醫詳細檢查,發現呢隻慘遭辣手蹂躪嘅狗女頭骨有一大凹洞,一邊下顎脫臼,眼球及四肢相信神經受損,不自主擺動並無法站立,對光及觸摸敏感!警方接報到場後,將案件列作「殘酷對待動物」調查。動物的命也是命,佢哋一樣有生存權,功夫茶希望有關部門切要積極跟進,將狂徒緝拿歸案!

講開殘酷虐待動物案,司底驊都真係難辭其咎,今年初深井豪景花園有三十隻寵物被人從高處擲下,非死即傷,明明證據確鑿,加上有涉案人自首,司底驊仍以「證據不足」撤控,引來全城嘩然!自呢單嘢起,殘酷虐待動物案便接二連三地發生,好似元朗大棠路南坑排村發現鐵皮屋困住四十多隻貓狗,環境惡劣,絕大部分生滋,有些傷口更深可見骨,每有人經過或夜深便傳出陣陣哀號,佢哋恍如墮入無間地獄!司底驊全無惻隱之心,否則有乜可能對殘酷虐待動物者視而不見、見而不控?

呢,有句俗話係咁講:「鬼怕惡人蛇怕棍」,只要你態度強硬,就連鬼都怕咗你!蛇雖然可怕,之但係用棍就可對付!意思係人要勇於同邪惡鬥爭,就能克敵制勝。而民望長期食泥嘅司底驊,上任兩年多以來只知為官避事,撤控決定一次比一次離譜,一次比一次富爭議,由虐殺動物嘅兇嫌到反中亂港、一身都係罪嘅漢奸黎,皆無不如此!

司底驊席不暇暖就以「證據不足」放生漢奸黎嘅政治黑金案,而其涉及嘅違法佔中案一樣冇晒下文!依家漢奸黎涉嫌勾結外國勢力危害國家安全,警方早於八月十日引用國安法拘捕佢,但至今兩個多月仍然獲准保釋,難怪漢奸黎變本加厲,日日開直播抹黑中國唱衰香港,甚至公然勾結外國勢力干預中港內政!

一句「證據不足」,司底驊令動物墮無間地獄,亦令叛國禍港嘅漢奸黎逍遙法外!而佢又凡事濕濕碎、放膽去——撤控,有佢喺度霸住毛坑不拉矢,香港永難見青天!