中環出更：梁振英座駕撞車 妻受驚無送院
鯉魚門道近偉發道燈位往觀塘方向，尋日發生三車相撞交通意外，前特首梁振英太太梁唐青儀都咁啱喺其中一架車上面喎！佢雖然受驚，但冇受傷，都總算有驚無險。而梁振英尋日上晝就去咗深圳出席活動，唔知係咪因為趕唔切返嚟，所以就唔喺車上面喇。
三輛分別為七人車、輕型貨車同埋私家車，尋日順序停喺上址左二行車線，期間私家車疑溜前撞向輕型貨車，跟住輕型貨車再撞向七人車，多名司機見狀報警。受意外影響，現場部分行車線一度關閉，導致交通相當擠塞。警方其後到場調查，證實七人車為前特首梁振英座駕，當時梁唐青儀喺車上，佢報稱不適但冇受傷，故毋須送院。
梁振英不在車上 曾稱坐「AM車」買餸
話說梁振英喺今年四月曾接受媒體訪問，當時話好多官員因顧慮到俗稱「AM車」嘅政府車輛，會成為示威者破壞嘅目標而選擇換車。之不過，佢就話自己唔驚，仲話會坐車牌「AM222」嘅座駕到街市買餸、去花墟買花添。雖然今次唔係被示威者打爆，但睇嚟「AM」排頭嘅車，並唔保證路路平安囉！唔知經過今次嘅事件，梁振英會唔會考慮換車呢？
卓妮