中環出更：疫境抗抑鬱 鄭重科日做60下掌上壓
香港菁英會副主席鄭重科（Tony），雖身處內地已七個月，但對運動嘅熱情仍絲毫未減，近日佢就接受一項挑戰，連續廿五日將自己做掌上壓嘅片段上載至社交平台，響應關心精神健康嘅呼籲。雖然呢項挑戰只係要求每日做廿五下掌上壓，但Tony認為鍛煉體魄嘅動作做多幾下亦無妨，每日做夠六十下咁話。
本身都係菁英會龍舟隊隊長嘅Tony，指疫情雖導致集訓次數減少，但佢同隊員都要做「家課」，就係每日都要做三十下掌上壓，期望藉此帶動做埋其他鍛煉動作，後來遇上朋友提名參加今次挑戰，做掌上壓嘅次數就索性增加一倍。Tony話近幾個月來好多人都面對生意或工作嘅壓力，打算去球場或健身室出身汗抒發一下，又遇上球場拉閘或健身室關門，然而做掌上壓就勝在幾乎不受場地嘅限制，而佢上載社交平台嘅掌上壓片段為求新鮮感，亦盡量做到每日不同場景。對於有消息指，港府打算容許通過核酸檢測嘅逗留內地港人，返港後可豁免十四日「疫監」，Tony話若果落實當然係好事，不過都要中港雙方同時實施，至會方便中港民眾嘅往來。
湯振傑黃梓謙齊學俄國武術
講起精神健康，香港菁英會主席曾鳳珠就尤其關注老人家長時間深居簡出，擔心其精神同身體狀態每況愈下，所以Tony提名佢參與今次掌上壓挑戰，當然欣然接受。不過佢話男士可隨處做掌上壓，女士難以倣效，話要先慎選衣着同角度。
兒童事務委員會委員黃梓謙（Gary）亦都參與掌上壓挑戰。不過佢話最近成日落雨、加上平日有做其他運動，所以仲未完成挑戰喎。而佢近日就抽空同保良局總理湯振傑一齊學習俄羅斯武術西斯特瑪（Systema）喇。Gary話呢種武術唔單止講求個人意識，仲講求協調，所以對全身嘅系統及機能都有幫助o架。
卓妮