政情：何君堯整頓大計：港台新聞處合併
新一年度立法會會期已開鑼，繼內務委員會同財務委員會順利選出正、副主席，十八個事務委員會將會陸續進行選主席嘅事宜。當中，有傳一直高調支持要整肅香港電台（港台）嘅議員何君堯將會得到建制派嘅支持，空降落資訊科技及廣播事務委員會擔任主席。佢亦同本報記者強調話，港台絕對有改善空間，揸莊後會全力革新港台，包括研究將新聞處同港台合併，以透過重組提升「幫政府」嘅能量喎。
去年泛民議員喺內會選主席議程上拉布拖時間，導致議會一度停擺，不少建制派議員擔心重蹈內會亂局，於是決定協調人手，傾向包攬所有委員會嘅正副主席。其中，何君堯好大機會出任新一屆資訊科技及廣播事務委員會嘅主席。佢話新聞處同港台嘅架構重疊，兩邊都有成九至十二名處長級人員，令處長形同虛設，炮轟「要嚟冇用！」佢建議政府整頓人手，但目前未同其他人傾，只係自己探討緊，將會探求建制派嘅共識咁話喎。
精簡人手 重組「幫政府」能量
何君堯認為新聞處同港台要合併並精簡人手，強調要重組「幫政府」嘅能量，唔會再「拎個錘揼自己腳」。佢又覺得，前者主要推動政府政策同落實執行，而後者只係負責傳遞訊息嘅硬件，但批評兩個部門喺工作上一直冇溝通；喺推動政府政策上，雙方諗嘅嘢同做嘅嘢更係完全唔匹配，令人覺得思覺失調囉！
建制擬包攬委員會正副主席
至於上年度畀泛民包攬正、副主席嘅福利事務委員會亦將會被建制派「吞併」。據悉，建制為咗懲罰泛民上年度肆無忌憚嘅拉布行為，今年決定收番「友誼之手」，協調原本係衞生事務委員會主席嘅議員蔣麗芸，同旅遊界議員姚思榮，分別坐鎮福利事務委員會嘅正、副主席職位。
今次建制大規模動員，幾乎好多稍有年資嘅議員都要孭啲職位上身，但比對番現時傳出嘅各委員會正副主席名單，只有議員田北辰（田二少）係唯一一個咩職位都冇做嘅建制派議員。至於點解會咁？本報聽聞係田二少唔認同建制派包攬同協調委員會主席嘅做法，所以堅持唔會參與其中喇。