政情：美食車與旅遊綑綁 計劃最失敗地方
疫情肆虐，遊客絕迹，主要依賴旅客幫襯嘅美食車亦首當其衝。香港美食車聯盟主席林瑞華（Gordon）批評，政府成個計劃最失敗嘅地方，就係將美食車同旅遊綑綁，形容過去一年入境旅客人數大跌，美食車根本無可能做得住，估計政府喺出年二月計劃期屆滿時，計劃將會中止。
當局藉詞疫情 避與業界開會
根據當局資料，目前只有兩架美食車仍在經營，分別設於觀塘海濱同西九文化區。Gordon批評，政府過去提供畀美食車經營者嘅支援不足，就好似西九文化區呢個營運地點，亦都係由業界自己傾番嚟。佢又批評，當局一直以疫情為藉口，已經有一段頗長嘅時間冇再同業界開會，而旅遊同飲食界別嘅議會代表亦幫唔到佢哋。
根據政府數字，迪士尼樂園外係美食車少數有錢賺嘅營運地點，隨住樂園日前重開，會唔會為美食車帶嚟一線生機？Gordon就話，依家樂園嘅客量遠較之前少，加上本地人亦絕少幫襯，所以都唔會有生意。