政情：張宇人自爆妻兒開戶兌美金受阻
美國早前列出制裁中港官員名單，而行政會議成員就暫未受影響，但身兼行會成員嘅立法會議員葉劉淑儀早前曾公開話唔怕畀外國制裁，最多咪唔去英美國家，仲話正在捨棄美國資產，而另一行會成員兼立法會議員張宇人尋日接受電視節目訪問時都透露，政治風波已禍及妻兒，其太太同子女喺開立銀行戶口時遇到困難，仲感嘆子孫今後廿年都受影響。
嘆子孫今後廿年都受影響
張宇人喺訪問中話自己喺美國冇資產，其他地方都冇，亦坦言唔鍾意被制裁，但自己從政，已對家人構成影響，自爆太太同子女喺開立銀行戶口方面有困難，兌換美元都係，形容係不幸，話銀行知道自己係佢哋父親或丈夫，手續成日都要搞好耐，部分甚至寧願唔做佢哋生意。佢仲話自己嘅子孫同兒女喺今後廿年，隨時都會受影響，唔知點解會咁樣，但現今世界就係咁。
張宇人喺行會成員個人利益登記冊中顯示，佢同配偶喺沙田區擁有一個住宅同一個車位，冇持有海外物業。