政情：錯指張建宗要冇資助行業「識大體」 馬逢國哭訴完演藝界慘情要道歉
喺疫情持續下，大型活動同舞台演出完全停擺，香港活動及演藝製作界台前幕後大聯盟尋日再聯同議員馬逢國召開記者會哭訴慘況，而馬逢國就真係喺鏡頭前講到喊！佢聲淚俱下咁話心痛未有幫到業界爭取應有補貼，政務司司長張建宗更話希望未有獲幫助嘅行業「識大體」。但司長辦公室其後回應指張冇講過呢句說話，搞到馬逢國喊完又要認衰致歉。
話業界捱唔住就真係變「大體」
馬逢國話前後三十幾次去信政府各部門反映業界情況，最近亦代表業界提出廿一項建議，但最終只得一項援助措施部分落實，講講吓就喊咗出嚟，覺得成果有限，仲話曾自問有冇做好議員角色？佢話張建宗早前喺推出第三輪抗疫基金時曾講過，話希望未有獲幫助的行業「識大體」，佢反問咩係「大體」，又比喻業界捱唔住就真係變「大體」，仲話曾聽過有政府官員講「搞唔掂就申請綜援」，認為有關說法太涼薄，希望政府真係聆聽業界聲音。
但政務司司長辦公室發言人話張建宗從未講過任何界別或人士要「識大體」。之後馬逢國隨即喺社交平台承認混淆咗訊息，為言論引起其他人士誤會及對張造成困擾致歉。