中環出更：家居大掃除 彭關麗雯最唔捨得杯
喺疫情期間唔單止要注意個人衞生，家居衞生都好重要。大家多咗留喺屋企，係時候執下屋大掃除，實行「斷捨離」喇！博愛前主席彭少衍嘅太太彭關麗雯（Carman）話最近執屋都送走咗唔少衣物，另外就係將買返嚟嘅嘢開箱，究竟Carman買啲乜嘢返嚟呢？
Carman呢十幾年嚟愛上收藏杯，去到世界各地旅行都會買當地特色嘅杯，佢仲特別喺外國訂咗個玻璃櫃返嚟，更加好咁收藏啲杯嘛！酒杯當然可以自用飲酒啦，佢又話會將某啲杯送畀朋友，而有啲杯嘅設計就只適合觀賞，用唔到嚟飲嘢嘅。
鄭錦鐘自爆有寶盒裝舊照
人人收藏嘅嘢都唔同，小朋友可能係玩具，大人就可能會收藏模型。保良局前主席鄭錦鐘話新抱有日同佢講孫仔有一個寶盒收藏啲秘密嘢，佢就自爆都有個寶盒，入面有好多後生時嘅照片同埋學生時期嘅獎牌。佢話自己唔算做開運動，所以嗰兩塊分別屬於籃球同田徑比賽嘅獎牌就格外珍貴喇！至於執屋時最唔捨得唔要嘅嘢，就係同屋企人嘅相片，尤其係子女細個時嘅照片，更加係會好好收藏。
相片盛載好多回憶，睇番仲會發生好多趣事。仁濟前主席王賢訊（Vincent）嘅囡囡依家八個月大，父母之間最希望就係小朋友生得似自己。Vincent話最近執屋就同太太搵番各自細個嘅相出嚟，兩個人喺度爭論囡囡究竟似邊個多啲。Vincent又話其餘幾個小朋友開學要喺屋企網上上課，辛苦太太為小朋友預備筆記喇！
卓妮