中環出更：李貝詩：禁聚令下識變通 隔住個芒互隊啤

國際青年商會香港總會副會長李貝詩早前出席一個研討會時話，呢段時間要遵守防疫規例，雖然堂食早前由八人縮減至兩人一枱，但佢話限額唔好嘥，都會約朋友出街食飯，因為人與人之間聯繫好緊要，而疫情過咗梗係約番晒班朋友出嚟食飯。如果要多過兩個人聚會嘅話咁又點算好呢？佢提議大家可以買支啤酒，透過視像軟件聊天，隔住個屏幕吊吓癮，望梅止渴都係一個唔錯嘅方法吖！

鄭永翔籲疫下多裝備自己

獅子山青年商會會長林卓鋒話疫情改變咗佢嘅工作模式，多咗時間在家工作，加上屋企有小朋友，返工時間變得好唔定時，但能夠同時平衡到工作同家庭兩方面，享受天倫之樂，整體嚟講都係值得開心嘅。至於點樣回饋社會，佢認為第一件要做到嘅事就係自律，例如係減少外出食飯嘅機會，多買外賣，仲有就係返到屋企要即刻去沖涼。

林卓鋒話喺疫情下在家工作有所得着。

鄭永翔話凡事要睇得長遠啲，隨時準備好喺疫情後大放異彩。

受疫情影響，從事培訓同顧問工作嘅國際青年商會香港總會會長鄭永翔，課堂被迫取消或延期，生意有一定嘅影響，佢會安慰自己，疫情好快過，要把握時間不斷裝備自己，抱住正向思維嘅信念，凡事睇得長遠啲，準備好喺疫情後大放異彩，每日作小總結，諗吓有乜嘢進步，安排得好啲，有清晰頭腦就知道下一步點做。

晉峰青年商會前會長楊綺雯就話有朋友知道佢唔夠口罩用，特登話打算畀口罩佢用，佢唔單止感恩有朋友嘅幫助度過疫情，第一個要多謝嘅梗係屋企人，佢哋送上嘅關心遠遠多過其他人。

卓妮